Hòmber Konektá ta seshonnan di diálogo íntimo kaminda hòmbernan ta papia habrí tokante e ròl i desaroyo personal di mucha i hende hòmber. E meta ta pa krea un espasio seif pa hòmbernan kompartí nan eksperensia, pensamentu i sintimentunan.
Durante e periodo di yüni te ougùstùs 2025, MpowerMen a organisá diferente seshon riba temanan manera formashon di yu, hombresa, espektativanan, retonan personal, i speransa.
E seshonnan akí a bira realidat ku sosten finansiero di e programa ‘Herdenkingsjaar Slavernijverleden’.
Papi’é ku tatanan
Hòmbernan a reflehá riba nan ròl komo tata i riba e relashon ku nan mes tata i ku nan pareha. “Kon bo infansia tabata? Kon e relashon ku bo tata ta? Kiko abo komo hòmber mester?” Esaki tabata un par di e preguntanan ku a habri un porta pa hopi emoshon i reflekshon. Tatanan a konta kon e mama por afektá e relashon ku nan yu. A bini dilanti tambe ku mayoria tata no konosé nan derechinan.
Papi’é ku muhénan
Nos a papia tambe ku muhénan pa tende nan perspektiva. Segun nan, tin un desbalansa di energia entre hòmber i muhé ku ta kousa diferente tenshon i reto. Hopi muhé ta operá for di energia maskulino pasobra kresiendo muchanan a tende ku nan mester ta fuerte. Di e otro banda, hopi hòmber no sa kiko nan ke òf kon pa ekspresá esaki. Muhénan a reflehá ku e solushon ta den konekshon i empatia: krea espasio seif kaminda hòmber por papia i deskubrí nan mes sin miedu òf kritika.
Papi’é ku hòmbernan
Durante e di tres seshon, e hòmbernan a bai mas profundo den nan pensamentu. Nan a papia riba infansia, amistat, vulnerabilidat i liderazgo. E tabata un kòmbersashon intenso i yen di emoshon.
“Ken tabata bo role model? Lo bo bisa bo amigu si e ta hasi algu robes, manera ora e kòrta orea?” Nan a kòmbersá tokante konosementu propio, responsabilidat i e importansia pa mustra emoshon sin sinti bèrgwensa.
Sklabitut
Tur tres grupo a duna nan opinion si sklabitut ta sigui influensiá kon hòmbernan ta pensa i ta aktua. Mayoria a sinti ku e impakto ta grandi. Durante sklabitut, a separá hòmbernan for di nan famia. Pa sobrebibí, nan mester tabata fuerte i no mustra emoshon. E kustumber akí a bira parti di kultura di awendia: un kultura kaminda rèspèt i orguyo ta dominá, i papia habrí di emoshon a bira difísil.
Konklushon
E seshonnan di Hòmber Konektá a mustra ku tin un nesesidat grandi pa e tipo di diálogo akí. Kòmbersashonnan ku ta habri kaminda pa rekonesementu, sanashon i kambio. Esaki ta un di e métodonan pa krea un generashon nobo di hòmbernan ku ta mas konsiente, balansá i konektá ku nan mes.
Lesa mas den e artikulo ku a sali riba 11 di òktober 2025 den e kòrant Antilliaans Dagblad.